«Ашықтық, әділдік парасаттылық – өркениетті қоғам кепілі» тақырыбында жоғары сынып оқушылары қатысуымен дөңгелек үстел

№5 Ақарал жалпы орта білім беретін мектеп-гимназиясында  «Ашықтық, әділдік парасаттылық – өркениетті қоғам кепілі»  тақырыбында жоғары сынып оқушылары қатысуымен дөңгелек үстел  ұйымдастырылды. Іс-шараның мақсаты – оқушылардың бойында әділдік, адалдық, парасаттылық құндылықтарын қалыптастыру, сыбайлас жемқорлыққа қарсы мәдениетті дамыту және қоғамдағы ашықтық принципін насихаттау. Дөңгелек үстелді мектеп-гимназия директоры Г.Шаймерденова ашып, іс-шараның мәні мен маңыздылығына тоқталып, оқушыларды парасаттылық пен азаматтық жауапкершілікке тәрбиелеу бағытында мұндай кездесулердің маңызы зор екенін атап өтіп, белсенді қатысуға шақырды.

     Қатысушылар адалдық туралы бейнежазба тамашалап, өз ой-пікірлерімен бөлісіп, адалдықтың адам өміріндегі маңызы, қоғамдағы рөлі жайында тұжырым жасады. 

      Сонымен қатар, шағын топтарға бөлініп, «Әділдік бар жерде…», «Ашықтық – сенімнің негізі», «Парасаттылық тұлға келбеті», «Өркениетті қоғам моделі» тақырыптарында топтық жұмыстар орындады. Әр топ өз ойларын дәлелдермен жеткізіп, тұжырымдарын ортаға салып, пікір алмасу жүргізді.

     Қорытынды бөлімінде барлық топтың идеясы біріктіріліп, «Өркениетті қоғам – әр адамның ішкі адалдығынан басталады» деген тұжырым жасап, ашықтыққа, әділдікке шақырды. Бірлік шеңберіне тұрып, "адалдықтың шамын" — жағып, іштей таза ниетпен болашаққа сенім білдірді. Бір-біріне парасаттылық, әділдік пен ашықтық тілеп, қоғамға адал қызмет етуге уәде берді. Бұл сәт – әр адамның жүрегіндегі ішкі жарықтың, ел болашағына қосар үлесінің нышаны болды.